Kinari Juara “Nagari Rancak”

NAGARI RANCAK TINGKAT PROPINSI
SUMATERA BARAT, 2004

Hari Rabaa, tanggal 14 Juli kapatangko Kinari yo sabana rami. Hari nan saharitu dak ado urang pai kasawah sorangallahjuodah. Lah labiah duo paken nagari awakko dek babadak; yaitu sajak tim penilaian kabupaten mangecekkan nagari Kinari iyo rancak dan manjadi nagari nan dipatandiangkan rancak-e jo nagari nan lain di tingkek propinsi Sumatera Barat.

Pukua 10.00 pagi tim propinsi nan jumlahnyo 8 urang, didampingi tamu dari kabupaten 25 oto, disambuik di Pakan Akaik jo Tari Galombang. Saharitu, Piar Cs dari sanggar kesenian Tonggak Sakti, nan diasuah dek Si Nur anak Tek Idaen Angkumudo Maun, tampil heboh mahibur tim penilai nan didampingi dek Pak Gamawan Fauzi, bupati awak. Pak Elfi, wakia bupati, idakloh amuah tingga di Kayu Aro-dah, Pak Sekda betulo. Saluruh asisten, kapalo dinas lingkuik tungkuik turun ka Kinari sado-e. Mungkin langang kantua bupati di Kayuaro saritu gak-e nyah !

Pakan Akaik manguniang dek urang babajo saragen kantua. Anak-anak jo anggota masarakaek nan datang mancaliak dak taetong rami-edah.

Mulo-e, Tim Propinsi Sumbar idak picayo baso sado-e jalan dalen nagari Kinari lah batembokdah.

Sasudah Pak Wali presentasi di Gedung Baperna, ditunjang jo alat canggih, LCD projector nan nyomainkan dek Tak Ujang, dari KWK Padang, timtu turun mangaliliang nagari. “Mano mungkin ini dibangun dengan sumbangan masarakat saja?”, pikia-e.

Lalunyo tanyo ka salahsorang anggota masarakek nan tagak di tapi jalan. “Di mano babali simin-e Buk?”
“Ditampek Mak Baiyi”, jawaek nan ditanyo.
Lai bisa dicaliak bon pambaliannyo Pak”, tanyo-e ka Mak Baiyi nan manunjuak. “O… lai Pak.
Wakatu singgah di tampek baliautu di Tanjuang Tino, nyo caliakkan daftar penyumbang sado-e dek Mak Baiyi. “Ado sinan sado-e namo panyumbang tiok jorong naeh pak”, kecek mak Baiyi.

“Kenapa Pak Wali tidak merekap nilai tenaga tukang yang bekerja jalan ini sebagai sumbangan partisipasi, karena mereka tidak diupah ?”, tanyo tim penilai.

“Mereka karajo Lillahita’ala Pak, untuak jalan korong mereka sorang, nan bakarajo rami. Ado nan sudah bakarajo, karek ari, nyo pai ka sawah. Kasulitan awak manilai jo rupiah.

Lagi pulo kami idak manyangko baso iko ka apak tanyo dah!”

Lai idak jatuah-lo nilai kami dek karano idak ado catatan tanago goroturih Pak?”

Nan agak mangganja sakatiak, mungkin wakatu ado salah satu tim nan bapencartu naiak ka duo rumah panduduak.

“Lai ado WC di rumahko?”, tanyo-e.

“Idak…!” kecek pajakaciak nan tagak dalan rumahtu, jujur.

“Mano amak-ang?, kejar tim.

“Amak-e pai kasawah…!” timpal seseorang baduto.

“Ba-a caronyotu Pak Wali? Kecek Pak Wali 80% rumah tingga di Kinari lah ado kakuih.”

Wali: ”Banna Pak. Iko, Apak kabatulan naiak karumah nan dak punyo. Subalah ado, subalah ciek lai adopulotu Pak” !

Presentasi dimulai pukua 11.30. Pukua 13.00 saluruh rombongan tamu dan panitia panyambutan penilaiantu makan siang di rumah andeh Pak Wali, di Malayu.

Tampak-e, Pak Bupati jo rombongan sebagai tuan rumah bagi alek nan datang dari Padangtu lai bagadang ati, dan manunjuakkan wajah nan gembira.

“Kok urang nagari lain juo nan jadi juara satu lairih…

Iyo sah-ha banna rancak-e nagari urangtu nah…!” , kecek Tak Ujang nan lah biaso ki-in kamari di Sumatera Barat.

“De-en optimis kamanang. Ditambahlo, nagari awak lai barasieh dari plastik jo sarok barakaek sentuhan PKSB”, tukuak Tak Ujang nan lah pontang-pantiang maimput data presentasi ka powerpoint laptop-e.

Mokasih Tak Ujang…!
Samo mananti sa-elah awak apo nan manjadi kaputusan dek tim juri propinsitu.
Kok manang awak nantik lawannyo desa di Jawa Tengah lai, kaba-e.

Laporan Fekrynur St. Palindih,